Trog reloaded

Dear All,

Iz simer de scho glii wieder es Jahr zrügg vo üsere Reis und wohne doch o scho sit nüün Mönet i üsem nöie Deheime. U da berchunt dr Ürsu natürlche langsam wieder Hummeln im Arsch... 

Was i dere Ziit für ihn sehr irritierend isch xi, isch folgendi Frag: „Was? Du schaffsch nume 60%? Was machsch de du mit em Räscht vor Ziit?“

Er hätti da jewiils vili, kreativi Antworte… Wiu längwilig isches säute worde. Aber dAntwort druf isch natürlech folgendi:

Was me bsunders guet cha mache mit freier Ziit isch choche :-)

Und drum hei mir üs entschide, dases im 2016 wieder söu ä Trog gäh. U mir schribä hiä mir, wiu dä ja bi üs deheime statt fingt (nid wiu mir eh Einheit bilde). Choche wird aber eifach dr Ürsu u o dTrog-Adrässä wird nid g'änderet. dAnsch wird o wiiterhin ame spät oder vilech gar nid uftouche. Eifach das dr gwarnt siit, faus är gstresst isch wiu ds fliissige Häuferli fäuht :-)

Da o mir euter, müeder, und komplizierter wärdä, hei mir üs entschiide, das dr Trog nüm wüchentlech statt fingt. Mir hei eh nöie Modus entwicklet und dä xeht wi folgt us:

Am erste oder zwöite vo jedem Monet lade mir zwöi Date vo däm Monet, di derzue ghörige Menüs und dDoodle-Links zur Amäudig ufe (http://www.trog-bei-urs.blogspot.ch/).

DTrög wärdä normalerwiis am Fritig oder Samschtig statt finge. Jewiils denn, wenn mir gad nüd los hei. Ganz egoistisch. Müesst flexibu bliibe :-) Wases o wird gäh, isch dases haut Mau eh Donschtig breicht. Wiu mir z'viu los hei dä Monet :-) So wi im Februar. Haha. Eh Guete Start!

Gä wird’s es Apero, Vorspiis, Houptspiis und Dessert. Wyy müesster wi früecher säuber bringe (u da sich dr Ürsu doch immer Müeh git bi däm Geköche wär er dankbar wenn o dr Christoph Äschlimaa öppis angers würd bringe as chohlesüürehaltige Chuttlerugger – Rückfrage für guete Wii, Christoph Ä. us D., bitte a Christoph L. us B.). Choschte wird’s für dKarnivore 35.- und für dHerbivore 25.-. Platz hets nach wi vor für siebe Lüüt. Säubstverständlech döfe ou wi bis anhin Fründe, Familiämitglieder, Huustiär oder was o immer der momentan gad gärn heit, mitgno wärdä. Bitte nid kompliziert tue und im Notfall eifach Frage öbs es Äxtra-Plätzli hätt, statt sech nid azmäude. Säubstverständlech wird o nach wie vor für dVegis gsorget und faus dr öppis nid gärn heit, chöiter das o immer mäude und de wirds tuuscht. 

Lange Rede, kurzer Sinn… So wird das jewiils usxeh:

Trog "First Strike" - 19. Februar 2016

Apero:                          Suurteig-Brötli mit Meerrettich, gröikter Foräuä und igleitem Chürbis

Vorspiis:                       Winterleche Gflügusalat          

Houptspiis:                   Lachs are Dillsauce mit Rosa Pfäffer, Zitroneriis und Ingwer-Louch

Dessert:                       Es Schoggimousse                        

Link für Amäudige:     http://doodle.com/poll/hef6na369tp9er6a          

dVegis chöme Curry-FrüschChäs, Pilzli und bachnige Ricotta mit Chili und Honig.

Trog "I am going Nuts" - 25. Febrar 2016

Apero:                      Eh Doppleti Boumnuss                       

Vorspiis:                   Fischli mit Haselnusskruste

Houptspiis:              Stir Fry mit Cashew Nuts, Pata Negra Filet und Riis-Noodles mit Ingwer

Dessert:                   Bourbon-Pecan Pie              

Link für Amäudige: http://doodle.com/poll/n4fsiv7cb6ndiasx              

dVegis chöme eh gfüllte Pilz mit Haselnusskruste und Curry-Tofu.

Got it? Good. 

Ds nächste Ufschaltdatum wird dr 1. oder 2. März si für dDate im März.

Mir fröie üs, we dir üs bsuechet ar Mittelstrasse 66, 3012 Bern. Mit Bus Nr. 11 oder 21 chömeter vom Bahnhof fasch vor üsere Huustür ah, wenn dr bim Bierhübeli usstiiget. Afah düemer wi früecher am 19:30 Uhr.

Dir döft dr Link vom Trog natürlech o wiiterleite. Es si nümme aui Telefon-Nr. und E-Mail Adrässä aktuell und a däm söus de nid ligge. Merci.

Cheers

Dr Trog

Ps. Faus dr Zwiifu heit… er cha no choche, dr Ürsu…