Ahoi
Wi immer chani mi nid guet churz fasse… wär aso dä Blog nid ganz ma läsä, söu doch eifach bis zu de Stärnli abescrolle – ded isch dChurzfassig :-)
Wie vieli vo öich wüssä, hani sit em Januar es nöis Deheime (ar Nidaugasse 60, 2502). Es isch es Ziitli gange, aber mittlerwiile chani sogar eh Tisch mit 8 Stüehl mis Eige nenne und mini Gescht müesse nüm us Plastiktäuer ässä…
Uf üsere Reis hani mir überleit, dasi chönt probiere, mit mit mine Chochkünscht öppis a‘zfah. Wiiter si mer zwe gueti Fründe i Sinn cho, wo dr Name vo dere Idee und däm Blogg präge… Hiäzu eh chlini Anekdote us emne früechere Läbä:
Bevor är is Verliss uf Lyss zoge isch, het Mau eh Blaufuesstölpel in Biel gwohnt. Dä Blaufuesstölpel het gärn guet g’ässä und sech drum gfröit, das es angers Mandli, nenne mers der ehemals Dicke, gärn chochet. Oftmals ischs de so xi, dases bim Dicke z’viu z’ässä het gäh und är dRäschte am Tölpel verfüetteret het. Us däm het sech folgendes ergäh: der Trog. Dr Dick het de am Tölpel ame gschribä, är chönni dr Trog cho hole und dä wiederum het sech ufe Wäg gmacht für si Napf usem Briäfchaschte go z’hole. Das ganze isch sowiit gange, das de dr Tölpel glii o d’obe im Wohnzimmer um nes Fressi-Fressi bättlet het. Säubstverständlech heter das o regumässig übercho, allerdings het ne das derzue verleitet dHang z’biisse wone füetteret. Er het nämlech regumässig über ds Fleischagebot gmotzt. Das wiederum het die Dame des Hauses derzue veralasst am Tölpel Huusverbot in Sachen Essen azdrohe. I sire gränzälose Wiitsichtigkeit het dr Tölpel di Warnige aber i Wind gschlage und so ischs cho wis het müesse: si Trog isch läär bliibe.
Das sech di beide und ou aui angere uf neutralem Grund chöi begägne, hani iz beschlosse, dases wieder eh Trog söu gäh… und zwar bi mir deheime. I wirde pro Wuche einisch für 7 Lüüt es z’Nacht abiätä. Di z’Nacht bestöh jewiils usemne Apero, ere Vor- u Houptspiis und emne Dessert. Iglade si aui, Ischränkige gits kener. Iglade si säubstverständlech ou Lüüt wo ig nid kenne… Heiter aso eh einsami Grosle, es schwierigs Date wo dr nid wüsst was rede oder süsch öpper wo dir gärn würdet mitnäh, de döftir diä gärn mitbringe. Begränzig isch jewiils eifach dr Platz. Si di 7 Plätz vou, müesster nech eh Wuche gedulde.
D’Ässä wärdä abwächsligswiis am Mittwoch und am Donschtig stattfinde. Das us fougende Gründ: es git Gstalte i mim Umfäud wo emne wiisse Bäueli mit Löcher drin nocheseckle, anger schänkä Wii und Biär ire Bar us, wider angeri wohne u schaffe i färne Stedt (Basu, Luzärn und Züri). Das o aui härä möge foht ds Apero jewiils zwüsche 19:15-19:30 ah. Gstartet wird das ganze am 5. April 2012.
Ds Menü vor Wuche wird jewiils am Sundig oder Mändig ufem Blog ufgschaltet (http://trog-bei-urs.blogspot.com) und derzue gits eh Doodle-Link wo dir öich chöit go iträgä. I wett aune dMöglechkeit gäh z’cho, o dene wo haut nid so viu am Computer si und nid so viu Ziit hei… drum chame o nid Wuchene zum Voruus aus blockiere. Absage si nid erwünscht. We dr aso weit cho, überlegget nechs, träget nech ih und när chömeter.
Für aui Skeptiker, dueni iz afe z’erste Menü priisgäh:
Italiano
Apero: Mini-Pizza
Vorspeise: Selbstgemachte Ravioli mit Gemüsefüllung
Hauptgang: Risotto mit Saltimbocca
Dessert: Tiramisu
Wiiter wird’s keh Alkohol gäh… das usem eifach Grund, dasi nid jede Tag sött trinke :-) wettet dir aso es Gläsli Wii oder es Biär zum z’Nacht, so müesster das haut säuber mitbringe. Frei nachem Motto: Bring your own Drinks!
Guet… was gits süsch no? Eigetlech nüd! Vilech chunt ja dr einti oder dr anger vo öich Mau verbii. Vilech fingeter aber di Idee ou doof, z‘tüür oder schetzet mini Chochkünscht fautsch ih! Egal wis usechunt, probiere mer das doch eifach Mau. Für 8 Wuche hani iz Menüs und di wärdä iz eifach dürezoge. Fauses de nüd wird, lömers haut de lo bliibe!
Cheers
Ürsu
********************************************************************************************************************
Kurzfassung:
Was? Essen bei Urs
Wann? Abwechslungsweise Mittwuch u Donnstig (Beginn: 5. April 2012, 1915-1930)
Wo? Nidaugasse 60, 2502 Biel
Wie lange? Essen derzeit für 8 Wochen geplant (bei Nicht-Erfolg Einstellung)
Wer? Aui wo das eMail berchöme, dr Blog kenne und dene ihri Begleiter
