News vom Trog

Hallo liäbi Trog-Gescht

I ha mir i de letschte Wuche überleit wis mit em Trog, resp. de Trög söu wiitergoh und bi uf folgendi Lösig cho... wi dir ja aui wüsst, bini weniger dr Wiikenner sondern meh dr Biärtrinker und Mann von Welt (Gemäss Götschi)... des Weiteren hani vermehrt ghört das dLüüt o Mau am Wucheändi möchte cho und drum ha ig mir fougendi Lösig für di zwöi Sache überleit... es wird in Zuekunft folgendes gäh:

Ei Motto-Trog pro Monet wos um Biär und Länder geit... i mache nech es Bispiu:

Motto-Trog Schwiiz
Apero:           Chäs-Chüechli
Vorspiis:        Egli, Felche oder Zander ufemne Rande-Carpaccio (für dVegis eh warme Geiss-Chäs)
Houptspiis:     Rösti mit Kalbsfilet und Pilzsauce (für dVegis es Spiugu-Ei und es Raclette)
Dessert:         Bire-Torte

Biär: Lago-Lodge, Hopfenperle, Brandlöscher

es isch mir bewusst das dir nid unbedingt weit Biär schleppe und drum wird ig das übernäh... zu jedem vo dene Motto-Trög gits pro Person zwöi Biär derzue (wenn dr nid gärn Biär heit, döfter wiiterhin säuber Wii mitbringe).

Es wird folgendi Motto-Trög gäh:
1) Schwiiz
2) Mexico
3) USA
4) Balkan (obwou i do no kes Biär kenne - Nik, Eno please help)
5) Thai
6) India
7) Frankreich/Belgiä
8) Irland

Es isch mir bewusst dases scho Trög het gäh wo ähnlech si xi, aber i wirde mi bemühe öppis angers z'mache, so das ou diä wo scho amne ähnleche Trog si xi öppis nöis überchöme! Evtl. wirdi de dMottos ou no abändere... diä do obe si weder fix no wärdä si i dere Reihefolg stattfinge...

Wenn dr meh Biär oder Wii weit as di zwöi Fläschli, please organize yourself. Ah... und no öppis: da ig ja Ziit zum vorbereite ha und dir evtl. no i Usgang weit (resp. mir evtl. no i Usgang wei) finge di Trög am Wucheänd scho am 19:00 statt!

Zu de angere Trög. Di wärdä wiiterhin am Mittwuch und Donschtig stattfinge. Somit wär när es Bispiu für ne Monet: Donstig, Mittwuch, Samstig, Donstig... oder so... da ig öppe Mau furt bi am Wucheänd wird ig mir usenäh öich eifach eh Wuche z'voruus z'informiere wenn das dä Motto-Trog stattfingt... Fritig oder Samstig... dWucheänd chani nech aber hiä scho Mau bekannt gäh:

April: 5. oder 6. April
Mai: 17. oder 18. Mai
Juni: 14. oder 15. Juni
Juli: 5. oder 6. Juli
Ougust: 30. oder 31. Ougust
Septämber: 13. oder 14. Septämber
Oktober: 25. oder 26. Oktober
Novämber: 8. oder 9. Novämber

So... i hoffe das isch verständlech xi... no öppis zu de angere Trög: es wird wi xeit, wiiterhin Trög gäh, aber es fallt mer zuenähmend schwär Mottos für jedi Wuche z'finge. Drum wird das stoppe... es git iz eifach es "normals" Menü wo ig Sache sueche wo i finge passe zämä, öb diä de es Motto gäbä oder nid isch ja glich :-)

Di nächste Trög und Ufschalt-Datum fingeter hiä:

http://trog-bei-urs.blogspot.ch/2013/01/trog-zum-neuen-jahr.html

Für am Donschtig hets no Plätz... göht doch z'Menü go luege wenn dr Ziit und Lust heit z'cho: http://trog-bei-urs.blogspot.ch/2013/02/oppis-fur-zgmuet.html

Und für aui diä wo dr Link no nid hei: http://trog-bei-urs.blogspot.com

No einisch: dir döft ou Lüüt bringe wo ig nid kenne... es isch jede willkomme!

Cheers

ürsu

Öppis für z'Gmüet

Ahoi (siit langer Ziit)

Auso, i ha mir füre Trog es paar Sache überleit, aber di muessi no ordne und dir berchömet de glii es Mail... iz aber Mau afe für diä Wuche öppis:

Eh Trog für z'Gmüet

Das isch ja bi däm Wätter öppe Mau abracht... es git chli nes Gmix us verschidnige Sache und i weiss o no nid aus und für wases mer würklech de längt... aber fougendes wäri adänkt:

Apero:                (Spinat)Chüechli
Vorspiis:              Wintergmües mitemne Fischli/Meeresgetiär
Houptspiis:          Schwiins-Filet mitere Orangesauce, Gmües und Biilage (Haha, sehr usfüehrend)
Dessert:              Omelette au beurre salée mit Öpfuschnitze

I weiss es isch nid gad sehr usfüehrlech wasi da ufschribä, aber vilech passt nech ja das einigermässe :-) i würd mi ämu fröie we dr chämet!

http://doodle.com/f2sva7a746rs4pg8

Churze Nami

ürsu

Trog am Morge

Ahoi

Wi akündet gits das Mau o es paar angeri Trög, unger angerem äbä dä Trog am Morge. Das wär am 9. Februar 2013 und zwar wetti denn Mau es paar Bäckersache abiätä! I ha dänkt i würdi das so uf di 11:30 mache. Dir chöit aber o ab de 11i iflüge und scho es Kafi näh, faus dr verhungeret.

I mache für denn fougendes a Selbstgebackten:

- Gipfeli
- Pain aux Chocolat
- Ruuchbrot mit caramelisierte Nüss und Fiige
- Zopf

Derzue hani dänkt würdi no Eierspeisen machen. Je nach Wunsch:
- Rüehrei
- Spiegelei
- 3-Minute Ei
- Omelette

Und när würdi no Pancakes mache wenn öpper wett. Confi, Honig, Anke, Chäs, Ufschnitt wirds o no ha...

Hiä wäri dr Link für dAmäudig:

http://doodle.com/wbxebdx2pwwpwc3i

Häbät eh gueti Wuche

ürsu