Ausgetrogt

Guete Morge

so, iz isches sowiit. Es ist ausgetrogt. Dr letschti Trog fingt am Samschtig am 21.12.2013 statt. Ziit Merci und Adieu z'sägä!

Hiä no es paar Zahle. vilech interessiere si nech ja :-) u wenn nid, chöiter ja abescrolle!

- 79 Trög hets gäh
- 103 verschiednigi Lüüt si cho
- Spitzeriiter ir Awäsäheit si dAnsch (79), dr Chrigu (63), dPetra (27), Cyru (22), dSäru u dr Nicu (je 18).
- 6 vo 7 Plätz si im Schnitt bsetzt xi
- Einisch isch dr Trog ir Ziit xi

Jup. Das wärs öppe. Somit bliibt mir no z'letschte Menü:

Apero:                        Es Einsams Lamm
Vorspiis 1:                   Es dopplets Coquille
Vorspiis 2:                   Es drüüfachs Ravioli (vegi)
Houptspiis:                  Es vierfachs Rot (Fleisch: Rind)
Dessert:                      Eh füflagigi Läckerei

Für dVegis gits:
- es einsams Geiss-Chäsli
- es dopplets Süppli
- es vierfachs Pilz-Arrangement

dr Räschte sötte dVegis chönne ässä! Ei Gang meh heisst o öppis tüürer: 35.- für dKarnivore, 25.- für dHerbivore. Wii müesster o z'letscht Mau säuber mitbringe! Afoh dued dr letscht Trog am 18:30 Uhr.

Hiä dr Link: http://doodle.com/v2nx4ipbk2qnv7kv

Merci aune viu Mau fürs cho! Het Spass gmacht!

Cheers und Adieu!

El Trog

Trog vom 19. Dezämber

Hellöu

So, no zwe Trög gits u när isch fertig. dr zwöit letscht het wieder einisch es Asiatischs Motto. I mache no einisch eh Japanisch aghuuchte Trog!

Was gits?

Apero:             Eggrolls (u zwar nid so wi in Amerika)
Vorspiis:          Äuä es Miso-Süppli :-)
Houptspiis:      Wasabi-Forelle mit Saké-Risotto und Pak-Choi
Dessert:           Lavendel-Mousse mit Aprikosen

Jup, das gits! We de Vegis das rächt wäri, de gäbts eh Wasabi-Tofu. I cha aber natürlech o öppis angers mache, just let me know!

Hiä wäri dr Link:

http://doodle.com/tswmmgu8d9hgty6y

I wünsche öich eh schöne Nami! und natürlech när es schöns Wucheänd!

ürsu

Eh wüudä Trog

Schiff Ahoi

so, es naht em Ändi! Am Samschtig isch dr drittletst Trog! Es git, dr Saison entsprächend öpps Wüuds :-)

Hiä wäri z'Menü wo öich am Samschtig, 14.12.2013 kredenzt wird:

Apero:                    Jägerbrot
Vorspiis:                 Fischersalat (warmi Peperonistreife und Lachs)
Houptspiis:             Wild mit Spätzli, Rotchruut, Röseli-Chöli und Marroni mitere Preiselbeersauce
Dessert:                  Tee-Glacé mit Rotwein Zwetschgen

Für dVegis gits as Houptspiis statt z'Wüud äs Pilzragout und zur Vorspiis weissis no gad nit. Natürlech ou öppis uf Peperoni. Vilech es Chäsli oder so öppis. Das muessi mer no überlegge!

Hiä wäri dr Doodle Link für nech azmäude:

http://doodle.com/3g9kgqy66rfy3b7f

dr Trog fingt zwar amne Samschtig statt, aber es isch kei Biär-Trog... oder z'mingst fingi das Wii besser passt. Auso, bitte es Wiili mitbringe!

Bitte beachte: mir gö am Sundig früeh go boarde und drum fingt dr Trog am 18:30 statt. Wenn das öpperem z'früeh isch, bitte mäude. I dämfau würdi när es SMS mache!

Häbät eh gueti Wuche

cheers

ürsu

Dr "i has scho" Trog

Schiff Ahoi

Mir chunt keh schlaui Houptspiis meh i Sinn, aber i muess doch dr Trog ufschalte... somit machi öppis woni gad gar nid gärn mache. i schalte Mau was uf, aber dHouptspiis isch haut no nid drbii...

Apero:           Blätterteig-Dinger mit Lachs und igleite Chrübis/Zucchetti
Vorspiis:        Pilzravioli de la Casa mit Tomatesauce und säubergmachten Brot
Houptspiis:    Jajajajajajajjaa... i weiss gad nüd schlaus
Dessert:         Schwäbus Vermicelle

So, i hoffe dir chömet glich und wünsche öich eh schöne Abe:

http://doodle.com/v73ig99zx9svqat3

Gruess

ürsu