Grischun Trog

Bien di

heisst das gloubs uf Bünderdüütsch (aso guete Tag)...

Dir entnämät däm ds Thema vom nächste Trog... es git Bünder-Ässä. D'Mel, mini Ex-Chefin, het mi uf das brocht und entsprächend hani dänkt i probiere iz das aus Mau us wo si so i ihrem Mam ihrem Chochbuech het... dr Vorteil dra isch, dir wärdät nid wüssä wases isch, wiu mes nämlech nid versteit :-)

Dr Chrigu het scho akündet daser äuä kes gueti Bewärtig wird abgäh... hoffe mer doch, das er nid rächt bhautet :-)

@Mel: du chasch ihm de wüescht sägä :-)

Auso... was gits z'Ässä am Donschtig, 6. Dezämber 2012?

Apero (u di versteit me no):     Bündner Chäs- u Fleischplättli mit säubergmachtem Brot
Vorspiis:                                 Capuns
Houptspiis:                             Pizzögel mit Siedfleisch und Dörrbohnen
Dessert (u mis Favoritewort):  Türggaribel mit Öpfumues, Zimt u Zucker


Für aui wo frei hei am Fritig oder sech am Fritig Morge wünschte si hättä: Mel bringt Originale Röteli usem Bündnerland mit (nid dr Fusel usem Coop)!

No eh Ufruef a aui... dr Trog isch nüm so vou wi o scho... wi am Afang xeit, isch o dänkt das dir döft Lüüt bringe wo ig nid kenne... Sprich: öii Müettere, Vättere, Groslene, Gschwüschterti, Liäbschafte und o süsch aui! Mir si eh offne Verein und düe aui härzlech wilkomme heisse :-)

Hiä wäri dr Doodle-Link:

http://doodle.com/x3gwmmbhtncrk6a8

häbät es guets Wucheänd u gniesset dr Schnee

sin seveser

ürsu

Späck Trog

Ahoi

Dr nächsti Trog fingt am 28. Novämber 2012 statt und het fougende Hingergrund. Gwüssi Herre bemängle immer dAbwäsäheit vo gnüegend Späck. Entsprächend wird hiä es Menü präsentiert wo i jedem Gang öppis "späckigs" het. Fougendes erwartet öich:

Apero:                  Rosmarin-Speck Grissini

Vorspeise:            Quiche mit Speck und Zwiebeln und es Salätli

Hauptspeise:         Schweinsfilet im Speck- und Gewürzmantel an Pflaumensauce und Wildreis

Dessert:                Späckschnitte

Das dVegis nid z'churz chöme isch das natürlech aus o Späckfrei möglech:

ds Grissini berchunt statt Späck grafflete Chäs, ds Quiche wird nid mit Späck und Zibele gfüllt sondern mitemne Tomate-Schnitz und as Houptspiis gits nid es Schwiinsfilet sondern eh Gmües-Rondelle. Ds Dessert wird säubstverständlech ou mit Vegetarisch verträgleche Zuetate zuebereitet!

Schribet nech ih unger:

http://doodle.com/eixx9xgtgaxqphd6

Wär sech für am Samschtig no wett amäude, hiä wäri ou no einisch für denn dr Link:

http://doodle.com/w4k7u3q9xcysn8ka

bis am Samschtig oder nächscht Mittwoch oder süsch glii Mau

ürsu

Geburi Ürsu

Grüessech mitenang

Es isch wieder Mau es Jahr is Land zoge und ig wirde scho 31gi… do gits nid viu z’sägä derzue… aber me chas ja glich fiire. Entsprächend hani fougende Vorschlag für öich: we dr nüd bessers z’düe heit, de chömet doch am Samstig, 24. Novämber ab de 19:00 zu mir.

Mini Idee wär, wenn ds Wätter mitspiut, das mer uf dr Terasse si und ded Glüehwyy, Kürbissuppe u öppis vom Grill ässä.

Am Samstag oft stark bewölkt und zeitweise Niederschlag, in den Alpen anfangs noch föhnige Aufhellungen. Schneefallgrenze von 1700 gegen 1200 Meter sinkend. 7 bis 9 Grad.

So xeht dWätterprogrnose us… erfröilech wi immer… aber was solls… wemers de abe müesse verschiebe, de söus haut de so si…

Dasi cha ichoufe und plane würd ig öich bitte, nech uf Doodle izträgä:

http://doodle.com/w4k7u3q9xcysn8ka

Faus dr das Mail verlüüret… es wär ou ufgschaltet uf em Trog: http://trog-bei-urs.blogspot.com

Wäreter so nätt und würdet no agäh was dr für ne Wurst wettet :-)

SW – für Schwiinsbratwurst

KW – für Kalbsbratwurst

VW – für Vegibratwurst

Da äuä di einti Häufti sech mit irgendwelche ifallsriiche Nämä wird amäude und di angeri Heufti vergisst ihri Wurst hinger ihrem Nama azgäh wird’s dä Abe eifach nachem Prinzip si: es het solangs het…

Bereitgstöut wird:

-       Chürbissuppe

-       Brötli (Olive, Tröchneti Tomate und Späck)

-       Wurscht (inkl. Ketchup, Sänf u Mayo)

-       Glüehwyy

-       Dessert

Bringet doch öies Gschänk in Form vo Biär oder Wii für öich säuber mit, das wird’s nämlech nid ha :-)

So… i gloub das wär öppe wasi z’sägä ha… i würd mi fröie we dr chiemtet.

Häbät eh gueti Wuche und eh churze Mändig

ürsu

Chrüsi-Müsi Trog

Hellöu

I ha mer überleit, wasi chönti mache, bi aber nid uf öppis schlaus cho und ha drum dänkt i mache Mau eh Trog wo aus nid unbedingt zämäpasst :-)

Am Trog vom Donschtig, 15. Novämber 2012 gits:

Apero:            Säubergmachti Schinkegipfeli
Vorspiis:          Randen Carpaccio mit emne Fischli
Houptspiis:      Lammrückenfilet mit säubergmachter Chrüterbutter, Härdöpfugratin und Herbstgmües
Dessert:          Zitronen-Tarte

Für dVegis gits nid es Schinkegipfeli sondern es Chäs-Ei Gipfeli, statt em Fischli isch uf de Rande es Geiss-Chäs Töschtli und zur Houptspiis gits eh Überraschig - sprich: i weisses no gad nid :-)

Hiä wäri dr Link zur Amäudig:

http://doodle.com/335xevmdvnb7crm9

Gruess u bis glii

ürsu

Herbst Trog

Em Wätter vo letscht Wuchenänd z'entnäh isch eigetlech scho Winter... aber i ha no eh Herbst-Trog Idee und entsprächend gits iz haut diä no... wemer Glück hei isch nächst Wuche wüescht u gruusig u de passt das ja o no gad... hahaha...

Was gits de so am Herbst-Trog vom 08. Novämber?

Apero:         Späck-Pfluume usem Bachofe (für dVegis wärdä dPfluume mit Chäs gfüllt)
Vorspiis:       Oef Mimosa ufemne Nüssler-Salat Bett
Houptspiis:   Chüngu (Zuebereitig steit no nid) mit Pommes Duchesse und Bachofezibeli
Dessert:        Zimtglace mit Rotwii-Zwätschgä

i weiss no nid gnau woni di Zwätschgä wirde härnäh, aber süsch gits de öppis ähnlechs... für dVegis: Zur Houptspiis gits entweder öppis mit Chürbis oder Süess-Härdöpfu.

När hani no öppis z'vermäude: ufgrund vore terminleche Unpässlechkeit fingt dr Trog i zwe Wuche am 15. Novämber (Donschtig) und nid am 14.11 wi akündet statt. 

Hiä wäri dr Doodle-Link zum amäude:

http://doodle.com/amnnf6vaxt4ckprd

häbät es schöns Wucheänd

ürsu