Wi dir vilech wüsst oder scho vernoh heit, si mir zrügg vo üsere Reis. DFröid haltet sech bi mir i sehr ängä Gränzä und drum muess me iz Ougemerk uf dZuekunft legge und uf was eim Fröid macht.
I däm Sinn hei mir üs entschiede, das mir üsi Wohnig wieder as Trog-Location düe bruuche.
Für aui diä wo nid, nüm oder no nid wüssä wi das es geit:
Trog: I choche für 7 Lüüt bi üs deheime. Dir döft Fründe, Familiä, Ahängsu etc. mitnäh u o dr Blog, resp. ds Whatsapp wiiterleite. U müesst nech mit de Links unge a de Menüs iträgä. We vou isch, isch vou. Es git immer Apero, Vorspiis, Houptspiis u Dessert. Aus isch Vegi u dir müesst öii Getränk säuber mitnäh. Kafi, Tee & Schnaps zum Schluss si inklusive.
Amäudige: immer über dLinks unge a de Menüs
Azahl Lüüt: Max. 7 chöi sech amäude
Ort: Mittelstrasse 66, 3012 Bern
Chöschte: 35.- pro Person für Apero, Vorspiis, Houptspiis und Dessert
Mitbringe: Sini eigete Getränk
I gloub, viu meh muess me nid wüssä. Vilech tüüschi mi aber ou. U i däm Fau döfter mer gärn schribä und i due nech's erklärä.
Auso. Here we go. I ha mer afe füf Menüs überleit. Eno seit immer, das dr Tüüfu mi ständig Begleiter sigi. Und drum föhmer doch ah mit:
The Devil's Playground - 30. Juni 2023
Apero: Gfüllti Tüüfeli
Vorspiis: Devil's Eggs
Houptspiis: Homemade Chili-Noodles mit Sugo Especiale
Dessert: Crème Brulée
Link: https://fragab.com/6PKSYZnj
Natürlech ischs scho nachere Wuche deheime so, das mer Japan sehr vermisse. U drum bruuchts unbedingt:
Missing Japan - 14. Juli 2023
Apero: Beer Snacks
Vorspiis: Some Dumplings
Houptspiis: 油そば (Anschi‘s Favorite)
Dessert: Matcha-パフ
Link: https://fragab.com/jXptHq9m
Langsam sött de o üsi Garteproduktion aglüffe si. U hoffentlech finge mer ded o paar Sache wo mer füre Trog chöi bruuche:
Summertime = Garteziit - 29. Juli 2023
Apero: Zucchini-Fritters
Vorspiis: Chalti Gurkesuppe
Houptspiis: Pap's chalti Tomate-Nuudle
Dessert: Brombeer-Türtli (vilech sis de o Himbeeri oder so...)
Link: https://fragab.com/xZ49qpmd
Iz isch scho Ougust und...
...s'isch heiss (Abchüele) - 5. Ougust 2023
Apero: Gazpacho-Shots
Vorspiis: Fattoush-Salad
Houptspiis: Kokos-Riis, Mango-Salsa und BBQ Jackfruit
Dessert: Iced-Tea
Link: https://fragab.com/T7Qb2K9h
Mir müesse unbedingt wieder Mau öppis frittiere. U das das räntiert, mache mer gad verschiednegi Sache. U somit git das:
Nicu's Favorites - 25. Ougust 2023
Apero: Spring-Rolls
Vorspiis: da muess mer ne no frage - löht nech la überrasche
Houptspiis: Thai Fried Rice
Dessert: Tarte aux Pommes
Link: https://fragab.com/xnN3XT4g
So isch das. I hoffe, dass vilech di Einti oder dr Anger Inträssä het wieder zu üs cho z'ässä. Luege mer Mau was da usechunt. Uf au Fäu wünsche mer öich aune eh schöne Tag und eh schöni Summerziit.
Vilech bis glii, Ürsu & Ansch
